"شهلا بهاردوست" ون حیات و یارادیجیلیغی / ترجمه به ترکی: علیرضا ذیحق ( شعرهای شهلا بهاردوست و بیوگرافی کوتاه )

   ترجمه به ترکی :  علیرضا ذیحق

"شهلا بهاردوست" ون حیات و یارادیجیلیغی

شهلا بهاردوست فارسجا یازان گؤرکملی شاعیرلر دن دیر. او 1959-نجی ایلده تهران دا دوغولوب تحصیلاتینی یوکسک درجه ده دوام ائتدیره رک ، نئچه ایل لر معلم چی لیک له مشغول اولوری. سونرا،هم یاشاماق و هم عالی تحصیلینی دوام ائتدیرمک اوچون آلمانا گئدیری .

 

"شهلا بهاردوست" ون حیات و یارادیجیلیغی

   ترجمه به ترکی :  علیرضا ذیحق

شهلا بهاردوست فارسجا یازان گؤرکملی شاعیرلر دن دیر. او 1959-نجی ایلده تهران دا دوغولوب تحصیلاتینی یوکسک درجه ده دوام ائتدیره رک ، نئچه ایل لر معلم چی لیک له مشغول اولوری. سونرا،هم یاشاماق و هم عالی تحصیلینی دوام ائتدیرمک اوچون آلمانا گئدیری . او ایندی " هامبورگ " شهرینده یاشایاراق پداگوژی ساحه سی نین ایجتیماعی قولوندا فعالیت ائدیری. شهلا بهار دوست اروتیک و لیریک مضمون لو شعرلری ایله ، یئنی لیک دالیجا گزه ن بیر شاعیر دیر. او 14 شعر کیتابی نین مؤلیفی اولاراق چاپ اولموش اثرلریندن " یاشیل رویا "، "چیپلاق چیرپینتی لار " ، " دامجی لار" و" یئنی فصیل " کیتابلارینی آد آپارماق اولار . شهلا بهاردوست ون شعر حاققیندا بئله بیر قئیدی وار : " شعر دونیاسی ، رویالار عالمی دئمک دیر. شعر ، زمان لا مکان چرچیوه سینی سیندیرارکن ، دوشونجه لره قاناد وئریر و دویغولارا جان ..."      

1

سئوگی سئویم آیه لری 

گؤروب سنی دَره رک

آرزولاردان ، رویالاردان

سالخیم – سالخیم

ناغیل لارا ماهنی لارا آسلاییرام .

سنی من

 نفس لریم له

ساز جانینا، جالاییرام

دیکسه نمه دن قورخمادان

قوجاق – قوجاق باغریما

دویونله ییب، دولا ییرام .

یئل لرین قانادیله

بوتون گونو اَسه رک

گئجه اولجاق سنی من

دالغالارا قالاییرام .

سنی ایسلاق لایلا لاردان

شلا له لر آخیشیندان

اوغورلاییب پای آلیرام

یئرده قالمیش بولوتلاردان،

یاغیش لارین عطیریندن

کؤینک گئییب قایناشیرام .

سنی یاش تر ووجودوما

ایستی – ایستی یاپدیریرام

سنی آدسیز فصیل لردن

یالنیز اولجاق قاچیردیرام

لحظه لرین ایچینده کن

جان جان دئییب ،

داد آلیرام.

باهار چاتیب گولله نه رک

سنی من

بوغدا ائدیب گؤیه ردیره م

نوروز گونو هف سینه جان

قویوب سنی سئیر ائدیره م.

سنی عشقین

 سئویم سئوگی آیه لریله

کؤنلومه من

 یازاراق

اسکی قانون هر نه وارسا

اوزه رینه خط چکیره م .

جوه جوه دئییب نسیم لر له

قاناد چالیب اوچوشاراق

گول یارپاقین سن سانیرام

قوجاقلاییب قوخلاییرام .

سنی سولار نغمه سینه

هئی اوخونوب

هئی قوشولان ماهنی سینا

رقصین گولو

لاپ دا اؤزو ظن ائدیره م.

چیچک لرین اَته یینده

فواره لر اوزه رینده

قارانقوش لار قانادیندا

سن ایله هئی فیر لانیرام

رویالاردان ، آرزولاردان

سنی دَریب اؤزباغریما

نه کی وار باسدیریرام .

کپه نک لر شوق ایله سن

اوخو سن

من له اوخو

سئوگی سئویم آیه لرین!

هامبورگ 2008

2

 گئجه نین سَسی

نه فیشقا ، نه ده بیر ته یَر سسی

یول دان گئچه ن ده یوخ

 سس بئله یوخ دور !

گئجه آمما شئیطانلیق لا

قوجا خلوت کوچه لرده

 قولاغی سس ده

دایانیب دیر گولوری .

نَدَنسه آمما پیچیلتی لار

فَوّاره لرین شیریلتی سی نان

 اِهمالجا اَسَن یئل ایله

گئجیشسه ده

 بالا- بالا گلیری .

آیین ایشیقی دیر

و  چاتماغین چاغی

أل لر گَزَه رَک سا چلا ر قاراسین

آخیر نَدَن اینجه بئله

سیم سیخ  وورور حلقه بئله

د َلی چیلغین اولور تئله .

سحره تک اویناییب او خوسالار دا

سئویشمک سئویلمه ک 

داد لار وئریری .

اونودار کن زامانی

دینجه لمه دن یاتمادان

گؤرور لر اؤزلرین

یئل لر بئلینده

گون باتان واخ لارین

قیزیل گؤلون ده .

سیرّ ایله دولو گؤزلر ایله

اَسنه رکن آیریلیب

یولا دوشورلر

آزمیش دیده ر گین

جوموب گئدیر لر .

هم فیشقا ، هم ته یَر سسی

" یئنه گؤروشه ریک " دئیه سئوگی سسی

یاواش آستا

 قولاقلارا گلیری !

هامبورگ ، 26آپریل2007

3

ماهنی

گئجه نین اَن اوزون خییا بانیندا

مین لر آدسیز کوچه نین آراسیندا

یاتمادان چیرپینیر

 باشیم منیم

کئچیب گئتمیش

خاطیره لر یاتا قینا

آددیم لیر اوزاق دا بیر اوفوق یئنه .

شَهَر اودتوتوب یانارکن آخشامی

شعرین جانی دا بوشالیر نوردان

دووارین هرچا تیندا دولانیر تیکرار

قالاراق حیماسه ، گئری ده یالنیز .

درین دن اََسنه ییب گؤزآچسام دا گر

گؤزله ره م یا تمادان ،

بیر قوجاق باهاری یئنه .

بوش بیر یاتا قین

 کناریندا بئله

تومارام بیر اوزوگون

 قاشیناهله

صوبحه تک ورق لر کن قانون کیتابینی

هانسی آلاو یاندیریب دی

 گؤره سن ائویمی؟

سوفره یه قارقیش دا یاغارمی مگر؟

سینیب گیزلن مه یی هئچ ده سئومه دن

قالخام گرک آیاقا داها

اَزیلیب اینجی سه م تاپدانسام دا گر.

سالاراق یولومو

عشقین،

 سون قصیده سین دن

یازام من گرک

 یئپ یئنی

ماهنی لار داها. 

4

تقویم

گئدیره م ،

باش آشاغی بیر یولدا

بیر پارچا بولودلا

دامجی – دامجی گله ن یاغیش لا

اِهمالجا اَسَن یئل له .

گاه دان گونش ،

ساچلاریما گؤزآتیری

چای دا آخیری

آیاقیما دولاشیری

چیچک لرده

دووارلاردا اویناییری

عطیرلری

جان ائویمه ساتا سیری.

بیر قوشون اوخوماسی

منی حالدان حالا قویوری

نَفَسیمی آچیری

کیمسه یه اَل دَبَرتمه دن

 یولدان گئچه ن وارسادا

اونلارا گؤز سالمادان .

گئدیره م

قاماشان گؤزلریم له

گؤیون تاغی آلتیندان

بیر گؤی کی رنگی ده ،

یاریمچیلیق گؤیه چالیری.

ایلک باهار دا یولدادیر

 هامی دئییر

گلیری

گلیشی آمما نئجه دیر

گؤره سن  اونوددوغوم شن لیک لره

شاد بیر ماهنی قوشاجاق می ؟

اوزومون شکلینی ده

یادینا سالا جاق می ؟

بیلیرمی کیمسه دن آلا سوراغیمی؟

آلیرسا من دن نیشان آمما

آه لاریمین تیکراریندان

کؤنلومون ایظطیرابیندان

گونده مین یول یودوغوم خاطیره لردن

اونا هئچ نه دئمه یین .

اونا بیر قارانقوشون

 سئویم دولو آوازیندان

هله سؤنمز،

 ایشیلدایان بیر شام دان

سارماشیق لی پنجره دن

آلاچیق دان

کؤلگه لیک ده دایانان

ایکی صندل ایله بیر میز دن  دانیشین .

بیلیره م گلمه سه ده

آسیلییام هله من

 بیر کیشی نین قانادیندان

کؤینه یینین یاخاسیندان .

چاتارچاتماز گئدیره م

گون باتانا چاتیرام

تقویمی ورق لیره م. 

هامبورگ  2007