کیتاب تانیتیمی
علیرضا ذیحق " سون پاریلتی " نان پارلادی
آذربایجانلی شاعیر ، یازیچی و شفاهی خلق ادبیاتی میزین آراشدیریجی سی علیرضا ذیحق ، " سون پاریلتی " آدلی شعر کیتابینی یایماقلا دیلی میزین زنگین لی یینه اؤزونه اؤزل بیر شعر دیلی ایله ، یئنی بیر پارلانتی لا امضا آتدی . شاعیرین سئچیلمییش شعر لرینه شامیل اولان بو اثر قیرخ ایل لیک بیر یارادیجلیقین اؤرنه یی اولاراق ، اونون اینسانا و طبیعته اولان عشقینی آیدین جاسینا بیلدیره رک وطن سئوگی سینی ده اوستون توتوری . علیرضا ذیحق ین بو مجموعه ده گلن شعر لری بعضن اونون تاخما آدی " آغ چایلی " امضاسی نان 1356- نجی ایلدن بئله در گی لرده یاییلیب دیر و واختیندا تأثیرلی شعر لر سیراسیندا یئر آلیب دیر . شاعیرین بو یئنی کیتابی 1396- نجی ایلده " شعر سپید " انتشاراتی طرفیندن 114 صحیفه ده و جیبی بیچیم ده 1000نوسخه ده چاپ اولوب یاییلاراق 66شعره یئر وئریب دیر .
"علیرضا ذیحق " ین اثرلریندن " یئر گؤی عشق " ( حکایه لر مجموعه سی) و " خوی ناغیل لاری " ( خوی شهری نین فولکلوریک ناغیل و داستانلاری) دا یئنی لیک ده نشر اولوناراق اوخو جولارین ایلگی سین چکیب کیتاب بازاریندا بوتون نوسخه لری ساتیشا گئدیب دیر .
علیرضا ذیحق
سئودا
نه کئچن گونلره گون چیخار بیرده
نه درمان تاپیلار کؤهنه لمیش درده
ییرتیلماسین حورمت دئییلن پرده
باریشیق دونیادا ان گؤزل سؤز دور
***
اوره ک لر شن اولسون سؤزلریمیز دوز
دوز اینسان یاشاسین دونیادا یوز
دُوس دا قانماز اولسا تئز بوراخ ال اوز
آجی سؤز هر زامان سؤنمه ین کؤز دور
* * *
داشسین کؤنولده محبت سئل لری
داراسین سئودامیز ساچاق تئل لری
اونوتمایاق وطن داشی ائللری
ائولاد لار وطنه اینان کی گؤز دور
1396