داستان کوتاه " دیواری مشترک " از میترا داور به زبان ترکی / ترجمه : علیرضا ذیحق

 

میترا داور / ترجومه : علیرضا ذیحق

بیر اورتاق دووار

چوخ واختلار  ایسته رم کی بو دووارلار، نازیک بیر پرده کیمی کنارا چکیله و گؤره م  او دووارین دالیندا ، او قیرمیزی پرده لرو پبچیلتی لارین آردیندا نه لر کئچیر.

هر دن گیریش قاپی نین اؤ نونده ،اونو گؤ ره رم . قیزیل ساچلاری وقیرمیزی کاپشئنی له. بوتون محل اهلی اونو تانی ییر.حتتا آلت اوست خییا بان لارین بوتون جاوانلاری. هاراجان هله ایپی ایشلیر وکیملر ده تانیر بیله سین  هله سؤزوم یوخ .

  

میترا داور / ترجومه : علیرضا ذیحق

بیر اورتاق دووار

چوخ واختلار  ایسته رم کی بو دووارلار، نازیک بیر پرده کیمی کنارا چکیله و گؤره م  او دووارین دالیندا ، او قیرمیزی پرده لرو پبچیلتی لارین آردیندا نه لر کئچیر.

هر دن گیریش قاپی نین اؤ نونده ،اونو گؤ ره رم . قیزیل ساچلاری وقیرمیزی کاپشئنی له. بوتون محل اهلی اونو تانی ییر.حتتا آلت اوست خییا بان لارین بوتون جاوانلاری. هاراجان هله ایپی ایشلیر وکیملر ده تانیر بیله سین  هله سؤزوم یوخ .

گلیرم پئنجره یه ساری . جاوان بیر کیشی گؤرورم کی اورتاق دووارین اؤنوندن کئچه ره ک  دؤردونجو قاتا باخیری .باشیمی ایچه ری چکیب دووارین دالینا کئچیره م. شاید اونلاردان بیریسی دیر کی آدرسی دقیق بیلمیر .  بئله سینه ائله گؤزلری گزیری کی اورا لار دا بیر قیز گؤ ره . گیرده اوزلی ، قیسا ساچلی و اؤزوده ییرمی ییرمی اوچ یاشیندا .

اونو گؤردوک ده  گؤزلرین اوزومه تیکیری .گاهدان دا ماهانا آختاریر کی اوندان بلکه بیر زاد سوروشام ... اوست اوسته حؤوصله سیز بیری دیر و قاش فاباقی یئری نن گئدیر .

بو هفته نین وسط لرینده ایدی کی آخشامین آلتی سیندا، اونو ساغلام لیق و گؤزه ل لیک سالونوندا گؤردوم .

بوینونا قیرمیزی بیر ایپک شال دولامیشدی . ایچه ری گیرنده بوتون قادین لارین پیچیلتی سی  باشلاندی .

پریسا دئدی: " گلیب کی موشتری تاپسین ."

بیر آرواد کی باشینی ثابیت بیر چرخه یه دایامیشدی دئدی : " کیم دی کی موشتری آختاریر ؟ "

دئدیم : " ائله بیل یاتمیشدین آییلدین هه!"

باشینی اهمالجا منه ساری فیرلادیب و اَزیله اَزیله دئدی :" یانی سنین یوخون گلمیر هه ؟"

دئدیم : " یوخ . یاتماقا گؤیلوم یوخدور . سن ده بیر دوکترا گئت  کی بلکه توختا یاسان  و یو خون قاچا !"

اَلینی قولوما سورتوب دئدی : "اولما یا سن ده دوکتور دالیجا سان ؟"

اَلیمی  اَلیندن چیخارتدیم . گئتدی " تارا " یا ساری . اوزاقدان گوردوم تارانی اَلی له ازدیره رک اونا بیر سؤزلر دئییر .

منجه تارا  چو خدا موشتری دالیجا دئییل دی . جومموشدو اؤزعالمینه ودویونجا اؤزونه باخیردی . اؤیره تمن سالونونون وسطینده دوراراق بیردن بیره سسله ندی : " تئز اولون ... قاچین .. قاچ ... سنده قاچ ".

من له پریسا دا باشلادیق قاچما قا . قاچاراق آمما یئنه دانیشیر دیق .

پریسا یا دئدیم : " نظره گلیر کی سئوه رک بو ایش لری گؤرور . موشتری  او قدر ده بیله سینه موهومّ دئییل . شاید ده نه بیلییم. بلکه ده بیله لرینه عاشیق دیر و موشتری لرین داغیتماق ایسته میر ."

-              دوغرودان دا ساده سن ! پول دالیجادی ، پول .

-              دئییرسن یانی پول دا آلیری ؟ آمما پول دان چوخ شاید اونلاردان خوشلانیری . من او اوشاقلاری قییافه سین گؤرموشه م.

-              نه قییافه سیدی سن ده آخی ! یئر گؤیون قوردو دولار .

بیری اؤز موتورونان گله ر. گون باتا بات دا . بیربیر لرین گؤردوکده عصب له شر لر . تارا هئی ساققیز چئینه ر .... اوغلان لاپ سیسقانین بیری دی .اؤزوده خورما ساچلی .

اؤیره تمن منی له پریسا یا باخیب دئدی :"یئیین اولون... قاچین ... یولو کسمه یین ."بیر نئچه آن بیر بیریمیز دن  آیری قاچارکن اؤیره تمن اؤزوده باشلاییر صؤحبته و بیز یئنه ده دوشوروق دانیشما قا .

پریسا دئدی : "اَریم دن برک نیگه رانام."

-              دلی سن واللاه !

-              نه دلی بازاری دی؟ بونلار کی گؤرورسن هرنه دئسه ن ائله ر لر .کیتا ب اوزی آچدیرماق ، دوعا یازدیرماق،تاسا باخدیرما ق ونه کی عاغلان گلیر.

-              اؤز تای توش لارین آختاریرلار.ییرمی ییرمی اوچ یاشلاریندا بیرینی و یا دا بیر آز ،اویا ن بو یان .

-              محله ده بوقیز لاردان حَذر واجیب دی .

-              هر یئرده وار دیلار . تک بورا دئییل .سنین گؤردوگون بونلاردی ودئییرسن به  ائله قورتولدی .

-              یادیندا چیخدیق گئتدیک آلما نا ؟ ایکی قیچین تپدی بیر باشماقا کی گرک قئییده ک. بیلیرسن کی اوردا..قورخوردو کی منی اَلدن وئره .بوردا آمما گلیب قولدورلوق ائلیر .

-              " اِی ایران " آدلی موزیکی قویاراق،سسینی چوخالتدیلار و هامی دوشدو تووا .

-              قاچ ...قاچ گؤروم .. . بئش دَیقه چکمز...

قاپی نین اؤنونده آنا سی نین اوزونه دوروب چیغیریر :" لاپ دئیه جه یَم ، قوی بیلمه ین لر ده بیلسین لرکی آنام سان .هامیز ائله یه بیله ر سیز ...

-              آرواد لار اَل آتیر لار اوزلرینه . باشلاییر لار پیچیلتی یا .سس لری قانماق  اولمور .

-              من دئییردیم به عائیله سیزین بیری دیر !آنا دده دن خبر یوخ دی .

-              نئجه یوخ دور ؟ وار با با. کیشی نین لاپ دده سین یاندیریب لار . توک لری آغ آبباغیم اولسادا  اَللی یاشی هئچ اولماز .

-              دئییر لر آناسی اؤزون دن ده تئز خطّه دوشوب ...

-              ایسراغا گون آناسی آغزین آچیب گؤزون یومدوو بیر قیشقیریق سالدی کی گل گؤره سن .دئییردی بدبخت سن ائله بو مین تومن دن اؤتور ...

-              حتمَن آز ایمیش ها ؟

-              ییرمی اوتوز نفرین ائله اؤزوم گؤرموشه م .اون سگگیز یاشدان باشلا گئت ییرمی یئددی ییرمی سگگیز یا شینا . چوخلاری دا اوجا بوی .

" تارا " اوتورموشدو تَرپنمه ز چرخین اوستونده و دال با دال رکاب ویریردی .اوزونه با خاندا نظره گلیردی کی با جاراقلی بیر رسآم ساعاتلارجا اوتوروب بیله سینه قاش گؤز یاخیب دی . گؤزو یئنه آینادا ایدی . من ده ائله باخیردیم آینا یا . بیر اؤزومه بیر اونا بیر ده دؤورمه باخیردیم .

آروادلاردان بیرقیسمی   یئنه سالون دا قاچیر دیلار.  گؤزل لیک و جوانلیقی میزی قوروماق اوچون ، هامی میز تلاشدا یدیق .

تارا دان سوروشدوم : "نَدَن دیر کی بیزیم فیکریمیز ائله گؤزل لیک یانیندا دیر ؟ چوخ آز کیشی آمما واردی کی اوزونه یاغ بویا یاخا !"

با خدی بیله مه . جواب وئرمه دی ورکاب ویردی . یوخوسو تؤکولن آرواد ایره لی گلدی . یئنه اَل آتدی بدنیمه و سوروشدو : " دوکتورلار لا اویناما قا، نه دئییر سن ؟ "

پریسا دورموشد و کمر جهازی نین  اوستونده و بئلی ایله آیاق لارینی ساغا سولا بورجو داراق ، آینایا باخارکن گؤزو ائله تارا دا ایدی . تا را نین گؤزو ده گؤزل قومرال بیر قیزدا  کی حلقه شکلینده اولان قیزیل سیر قا لاری گؤزه ویریردی . قارا ساچلارینی دالدان بوغوب بورموشدی . قاچارکن توک لری دالغا _ دالغا  تر په نیر دی .

پریسا گلدی یانیما ودئدی : "گؤردونمی؟او قومرال قیزی دئییره م. نه قَدَر ده خوش سلقه دی !"

توپلانیب گلرکن پالتار لاریمیزی ده ییشیر دیک  کی گؤردوم  " تارا " او قره شین قیز ایله خوش بئش ائدیر . هر دانیشدیق دا ایسه ، سولانمیش دیلی ایله ، دوداقلارینی ایسلا دیردی .ائله همان آندا ایدی کی پریسا منی دومسوک لر کن قولاغیما دئدی :"گؤردون پئشه له ریدی !گئنه دئه گینه دیلخوشلوق ائلیر لر !دونیانین قوردو دولار".

اورتاق دووارا گؤز تیکیره م .بو دووار همیشه آرامیز دا دیر و منیم چوخ واخت  لار  دایاندیقیم یئر دیر .اؤزوده بیلمه دن کی  کیم یا کیم لر او تای دا بو دووارا دایا نیرلار .

پئنجره نی آچیرام. گئجه، یاری اولوبدور. بوتون ائولر قارانلیقا و سوکوتا دالیب لار.  اوزاقلار دا آمما بیر چیراغ ایشیلدیر... بیر پارا قوناقلیق لاردا، آرواد کیشی بیرگه اولمادان، خلوت ده کئچیری ...بعضی چیراغ لار یانیری آمما گؤرونموری .