کیتابخانا
ایران قادین ادبیاتی نین آدلیم سیماسی "میترا داور" ین اثرلری آنا دیلیمیزده
آچار ( حکایه لر مجموعه سی )
ایکی دیللی حکایه لر ( فارسجا – تورکجه )
یازار : میترا داور / تورکجه یه ترجومه : علیرضا ذیحق
بیرینجی چاپ : 1397 / یایین ائدی : انتشارات پر – تهران
میترا داور بیر آدلیم حکایه یازاری اولاراق ایران ادبیاتی نین فارسجا قولوندا یازیب یاراتماقدادیر . او 1344- نجو گونش ایلینده " فیروز کوه " دا آنادان اولوب دور . عالی تحصیلاتینی اقتصاد ساحه سینده آلیب کی تهران دا الزهرا یونیورسیته سینده بیتیریب دیر .
1374- نجی ایل دن یازماغا باشلایاراق چوخلی کیتابلار چاپ ائدیب دیر . اونون بیر پارا کیتابلاری ادبی یاریش لاردا بؤیوک عینوانلار قازانیب اؤدول آپاریب دیر .چاپ اولموش کیتابلاری عیبارتدیر : 1- قارانلیق اوزه ر ی آهو دور 2- بالیشین اوره یی 3- یاخشی اولدو دونیایا گلدین 4- میزین یانیندا کی صندل 5- ایکینجی قفسه 6- جاده 7- قطار حرکت حالیندا دیر 8- آغاج 9- دؤردونجو آکواریوم 10- نوشا خالا
علیرضا ذیحق بو یازیچی نین اثرلریندن 14 حکایه سئچه رک تورکجه یه ترجومه ائدیب فارسجا متن لرین ده کیتاب دا گتیریب دیر . بو ایکی دیللی کیتاب اوز قاپاغیندا " کلید " آدی آلاراق دال قاپاغیندا " آچار " آدی ایله چاپ اولوبدور . بو کیتاب حکایه ادبیاتیمیزی یئنی مدرن اثرلرله زنگین له دیری و بیر اؤرنک دیر علیرضا ذیحق ین قیرخ ایل لیک حکایه چالیشمالاری نین دوامیندا . بوندان اؤنجه او غلامحسین ساعدی ، صادق هدایت ، علیرضا عطاران ، جلال آل احمد ، سید محمد علی جمالزاده کیمی یازیچی لارین حکایه لرین ده آنا دیلیمیزه چئویریب دیر .