محمد رسول الله / شعری به زبان ترکی / علیرضا ذیحق

علیرضا ذیحق 

محمد رسول الله (ص)

داش‌دان‌آغاج‌دان‌یونولموش‌مین‌لرجه‌تانری

جهالت توزونو دونیایا یایدیقی آندا

پارلاییر ظولمتین جاهیل گؤزونده

آلیشان بیر گونش یئرین اوزونده.

آی اولدوز توی توتوب شن لیک قوپاریر

قاماشیر گؤزلری ملک لرین ده

دوغارکن سؤنمه ین بیر نور "آمنه".

 علیرضا ذیحق 

محمد رسول الله (ص)

داش‌دان‌آغاج‌دان‌یونولموش‌مین‌لرجه‌تانری

جهالت توزونو دونیایا یایدیقی آندا

پارلاییر ظولمتین جاهیل گؤزونده

آلیشان بیر گونش یئرین اوزونده.

آی اولدوز توی توتوب شن لیک قوپاریر

قاماشیر گؤزلری ملک لرین ده

دوغارکن سؤنمه ین بیر نور "آمنه".

موسانی، عیسانی، نوحی، خلیلی

ایشیق لار آلیری قوینونا بیر آن

گؤرورلر دنیزلر نورا چئوریلیب

تورپاق دا لعل ایله مرجان لاریله

دینله یرکن داوودون خوش الحانینی

سمانین سماع رقصی له بیرگه

"محمد" جمالین تانری اییذنی له

سئیر ائدیرلر دویماییرلار سحر اولونجا.

آنجاق ایبلیسین پوزقون کؤنولو

اسیر تیتره ییر بو موشتولوق دان

گؤزلرین دن یاغاراق حوزون یاشلاری

آند ایچیر تؤکدوره اینسان قانلاری

نمرودلار قابیل لر فیرعون لار یئتمه ییب

"حجاز" دا دونیادا وارلیق اولونجا

هوس دن گوناه دان بایراق قالدیرا

حسددن توخویا طاماح تورونو

آتا گؤل لرین بولور قلبی نه

کؤنول لر بولانا، شرلر پارلانا.

ملک لر یوردو او جنّت باغیندان

قُوودورارکن آدمی حوّانی بیر گون

دولدورا یئر اوزون دوستاق لاریله

ایشکنجه بوغونتو، اوغورلوق یالان

حیاتین چیراقلی بزه یی اولا.

ایبلیس شیطانین جیلدین گیره ندن

بیلسه ده آللاهین یاشار وارلیغین

یئنه ده عیناددان کوفردن دویمور

آدمین سعادت داشی یان یوکون

سیچان تک چئینه ییر جالادیر نورون.

نییه کی گون لرین کئچمیش لرینده

مقدّس بیر ملک اولسادا ایبلیس

چیخمیشدی یول دان یانلیش غورورلا

تانری آدَمی عزیز سایارکن.

ایبلیسین گؤزلری کول ایله دولدی

"محمد" دونیانین صفاسی اولدی

امین لیک دوزلویون میثالی اولدی.

آتاسی گون کیمی باتسادا واخت سیز

"آمنه" سؤنسه ده، سؤنر شام کیمی جان سیز

کیمسه یه سیغمادان، تانری یا سیغدی

آلتی یاشدان قالاراق کیمسه سیزنبی.

"ابوطالب" ایله "عبدالمطلّب" ووقارلاریله

آتاسی "عبدالله" ین عطرین وئره رک

آجی یا دؤزمه یی صبیر ائتمه یی

اوجا داغلار قدر گوجلو قالماغی

همده محبت له سئوگی نین دادین

اونا داددیریب اؤیره درکن

بوی‌آتدی‌یاشادی،اؤزسُویونون‌پاک‌نفسی‌له.

واری یوخ دان یارادان تانری

دومانا چئوریلن مظلوملار آهین

قادین‌لارگلین‌لرقیزلارین‌تاپدانمیش حاققین

بیر داها اینسانلارین یادینا سالدی

"محمد" عشقینه آییق ووجدانلار

طاغوتا بُت لارا أییلمز اولدی.

طبیعت یام یاشیل اولمازسادا اوردا

"مکّه"نین گول چیچک‌سیز چؤل لرینده ده

عطیرلر ساچیردی "کعبه" دونیایا.

"محمد" ده چیخارکن سفره سئیره

داشیردی آللاهین نورونو گؤزده

سازالماز دردلرین ده درمانین مرهمین

آزادلیق، مساوات، عدالت بیلیب

بیرلیک دن دیری لیک دوغارکن دئیه.

آللاهین جلالین "حَرا" داغیندا

نییاییش نیداسی له گولله ندیریردی

چاتینجا قیرخ یاشا جبرئیل گلدی

نبوّت موژده سین هدیه وئره رکن.

"محمد" تانری نین رسولی اولدی

اوره یی "وحی" ایله جالاندی دولدی.

حیات یولداشی سایین "خدیجة"

"وحی" ین بشارتین آلدی جانینان

ایمان دا اینام دا اوسوه اولاراق

اسلام دینی نین فخرلی، یاوری اولدی.

سونرادا مردلرین مردی مورادی

"علی" بیر عؤمور پیغمبرین جانانی اولدی

"محمد" بعثت ایله عدلی، جهادی

ظولمون اؤنون ده بیر سیپَر ائتدی

تانری نین بیرلی یی گرچک اولارکن

تیتره دی قیصرین روم دا سارایی

ایرانین شاهی ده چکدی هارایی.

اومودسوز صاباح سیز خسته اوره ک لر

فریادا عوصیانا قییامه قاخدی.

اون اوچ ایل مکّه ده اسلام چاغریشی

زره، زورا زیوره تهلوکه اولدی.

ایلاهی دویغولار چاغلاییب آخدی

نبی نین دعوتی دونیایا چاتدی

ایشکنجه، اسارت، اذیت آمما

سارسیدارکن مکّه ده مسلمان لاری

همده"محمد" جانینا قیی ماق آماجی

بوتون دوشمن لرین شوعاری اولدی.

تؤهمت لر یایان تانری دانانلار

قاخدیلار تؤکمه یه"محمد" قانین

"علی" نین آمما خبری اولجاق

شهادت عشقینه ایمان شأنینه

یاتماق ایله گئجه نی رسول یئرینده

قیلیش لار "علی" نی پارام پارچالارکن

دوشدولر آختارماغا نبی نی بیرده.

پیامبر ایلاهی یاردیم لاریله

گؤردو گیزلین دی یی غاردا بیر آن دا

مین لر توراتان تورلار توخودو

کؤهولون آغزینی اؤرتوب باسیردی.

دوشمان لار أل اوزه رکن اومودلاریندان

پیامبر هیجرتین تملین قویدو

یثرب" اهلی "محمد" ی آلیب باغرینا

ائتدی لر گؤزلرین ببه یی نورو.

نبی نین آرخاسی دایاغی "یثرب"

"مدینه" آدلانیب گول چیچک اولدی.

هیجرتین ایل لری آغیر جنگ لر

باشلاندی موشریک لرین قوشون لاریله

اوخ لار قیلیش لار عمود نئیزه لر

یاغارکن مسلمان یوزلر ای ییده

اولدی شهادت ، ناماز دوعاسی.

سونوندا "خئیبر" ین قالاسی چؤکدی

بوتون دوشمن لرین چیراغی سؤندی

ظفرلر قازاندی حق له عدالت.

"مکّه" نی فتح ائده رکن اسلامین گوجو

پیامبر سئویملی گؤزل لحن ایله

آزادلیق فرمانینی اعلام ائده رکن

کیمسه نین آخمادی بورنوندان قانی.

حقیقت بایراقی قرآن نواسی

پایلادی دونیایا سئوگی نیداسی.

ظفردن کئچه رک اون ایلجه تامام

حج دن گله رک خلق ایله رسول

پیامبر "علی" نی ولی سی سئچدی

بیر ایل سونرادا خسته جانیله

"علی" نین چیی نینه باشین قویارکن

جیسمینی ترک ائدیب عرشه اوجالدی.

بو اوچوش آمما کئچمیش سفر تک

"معراج" دئییل دی قاییدا رسول.

مدینه یاس توتوب گؤزلر آغلادی

مسلمان اوممه تین بو داغ داغلادی

ملک لرله بیرلیک ده قان یاش تؤکه رک

حوزون لی داملالار سئل اولدی آخدی.

عصیرلر اؤتوب یوزلر ایل کئچسه ده

مسلمان بیر مبارز اینقلابچی روحلا

فریادلار قوپاریب حق دن دئیه رک

سایریشان گؤزلریله بیردن آغلادی

"فاطمه" نامینه چاتدیقی آن دا

تکجه بیر جومله ایله قورتاردی سؤزی:

"فاطمه، فاطمه دیر" فقط بو قدر

من ده بیر سؤز تاپمادان رسول شأنینه:

سؤیله رم قلبیم له بؤیوک اینام لا

"کربلا" نین "حسین" ین بسله ین آنا

"محمد" قیزی "فاطمه" دیر، "فاطمه" دیر!