قصه های قرآن به زبان ترکی /( قرآن ناغیل لاری ) / جرجیس نبی نین داستانی / علیرضا ذیحق

  علیرضا ذیحق

جرجیس نبی نین داستانی

اولو و بیرجه بؤیوک آللاهین امریله ، جرجیس آدلی بیر نبی کی نَسَبی روم لو ایدی و فیلیسطین ده یاشاییردی مأمور اولور کی " شام " حاکیمینی توحیده چاغیرسین . آمما او ظالیم پادیشاه ، جرجیس ین دعوتینه قولاق آسمادان ، ائتدی یی جسارت اوزره اونون ایشکنجه سینه فرمان وئریر. اونون ووجودونو پیچاق لا یارا لارکن سیرکه خومونا  باسیرلار و خوم دان چیخارتدیقدا بَدَنینی داغلاییر لار. سونرا اَل لرینه و آیاق لارینا چارلی چارپاز میخ لار ویریب باشینی دَله رکن ایچینه داغ قورقوشوم لار تؤکورلر.

   علیرضا ذیحق

جرجیس نبی نین داستانی

اولو و بیرجه بؤیوک آللاهین امریله ، جرجیس آدلی بیر نبی کی نَسَبی روم لو ایدی و فیلیسطین ده یاشاییردی مأمور اولور کی " شام " حاکیمینی توحیده چاغیرسین . آمما او ظالیم پادیشاه ، جرجیس ین دعوتینه قولاق آسمادان ، ائتدی یی جسارت اوزره اونون ایشکنجه سینه فرمان وئریر. اونون ووجودونو پیچاق لا یارا لارکن سیرکه خومونا  باسیرلار و خوم دان چیخارتدیقدا بَدَنینی داغلاییر لار. سونرا اَل لرینه و آیاق لارینا چارلی چارپاز میخ لار ویریب باشینی دَله رکن ایچینه داغ قورقوشوم لار تؤکورلر.

آنجاق تانری ، مَلَک لرین دن ایسته ییر کی اونو یئنی دن حیاتا قارتار ماقلا بیله سینه دئسین لر کی اونو دؤرد دفعه اؤلدورسه لرده یئنه ده دیریلیب یاشاییشا باشلایا جاق دیر . او قان ایچَن جلّاد پادشاه ، سَحَری گؤره رکن کی جرجیس یئنه ده حیاتدادیر بوتون سئحیرکارلاری باشینا ییغیب اونون بیر داها اؤلدورولمه سینی ایستیر.

جرجیس نبی یه سئحیر جادو اثر ائتمه دن بیله سینه زَهر ایچیتسه لرده یئنه اؤلوم دن قاییدیر . شامین حاکیمی ایشی بئله گؤردوک ده جرجیس ین شاققالانماسینی ایستیر و هر شاققاسینی بیر قویویا سالدیریر.

شام حاکیمی ، جرجیس ین اؤلومونه سئوینه رک بوتون اؤلکه ده شن لیک قورولور آمما خلقین چال چاغیر آنیندا بیردن بیره یئر گؤی تیتره ییر و جر جیس ساغلام حالدا ظاهیر اولور . بو معجزه نی گؤره ن خلق هامیسی جرجیس ین آیا قینا دوشوب اونا ایمان گتیرسه لرده آمما او ییرتیجی و کافر حاکیم بوتون قوشونونا دستور وئریر کی مؤمن جماعتی قیلینج دان کئچیره رک اونلاری یانار تونقال لارا آتسین لار.

جرجیس نبی نی ده آتیرلار او آلاو لارین کامینا و سونرا کولونو یئله وئریب گؤیه ساویریر لار.

بؤیوک و گؤرونمز تانری اونون دیریلمه سینه قرار وئره رک بیر توفان قوپور و جرجیس ین کول لری بیر یئره توپلانارکن کوللر ایچیندن یئنی دن باش قاغزاییر.

بو سیرا جرجیس خلق ایچره قاییدیب تانری نین بیر لی یین دن یئنه بیر داها سؤز آچاراق ، سولطانین امری او اولور کی بیله سینی بوخچونان بؤله رک قاینار قازان لاردا قایناتسین لار.

جرجیس آمما یئنه حیات تاپیپ آللاهین بیر لی یین دن دانیشاراق ، حاکیمین زورونان بوتون شام اهلی اَل ده قیلینج یومولورلار جرجیس نبی نین اوستونه  و جرجیس نبی بودفعه حیاتا بیر یوللوق گؤز یومورسادا ، تانری نین گؤروشونه نائیل اولجاق ، بوتون غافیل جماعته عذاب دیله ییر و در حال او اؤلکه نین اینسانلاری قیریلاراق نه  تاج دان خبر قالیر نه تخت دن .