خوی ناغیل لاریندان : زیرناچی / یازی یا آلان : علیرضا ذیحق

علیرضا ذیحق

خو ی ناغیل لاریندان :

زیرناچی

بیر گون وارایدی بیر گون یوخ ایدی .گون لرین بیرینده زیرناچی بیر کیشی وار ایدی .زیرنا چالان دیشی دوشموشدی و کاسیب لیخ  بوله سینه بَح زور وئریردی .سالدی چیخدی گؤردی اؤلمه سی فالماسین نان یاخچی دی .قوللارینی بوش بئکار توولویوب قره گون نن اَل لَش مَح بوله سین یورموشدی .باشینا ویریر کی گئده  شاهین یانینا . شاه قاپی سیندا نؤکرلر  اونو گؤروب قووورلار .

 

علیرضا ذیحق

خو ی ناغیل لاریندان :

زیرناچی

بیر گون وارایدی بیر گون یوخ ایدی .گون لرین بیرینده زیرناچی بیر کیشی وار ایدی .زیرنا چالان دیشی دوشموشدی و کاسیب لیخ  بوله سینه بَح زور وئریردی .سالدی چیخدی گؤردی اؤلمه سی فالماسین نان یاخچی دی .قوللارینی بوش بئکار توولویوب قره گون نن اَل لَش مَح بوله سین یورموشدی .باشینا ویریر کی گئده  شاهین یانینا . شاه قاپی سیندا نؤکرلر  اونو گؤروب قووورلار .آمما او اَل لَرین نن قورتولوب قاپینی وئریر تَپی یه .شاه سوروشور : " بو های کوو نَدی دوشوب ؟ "دئییللر : " آجین بیری  گلیب دئییر شا ها سؤزوم وار!"شاه دئییر : " اوسسون . قویون گلسین گؤروم سؤزونون آدی نَدی ."زیر ناچی ایچه ری گیریب دئییر : " بو بیر سؤزدی کی فقط گَرَح اؤز قولاغیزا دییه م ." سورا باشلیر آغزین نان چیخانی شاها دئمه یه واونی بیر یوللوق یویوب آریتداماغا . شاه گؤرور بو هرکس دی جانین نان دویوب دی آمما او قَدَر ده آنناغی وارکی بو سؤزلری اوجادان دئمه دی و منیم حؤرمتی می اؤزگه لر یانیندا سیندیر مادی . اونا گؤره امر ائلیر کی اونا بیر توربا قیزیل وئریب عیز زَت اِحتیرامی نان یولا سالالار ." وزیرین کی بو ایشه آغزی آچیخ قالمیشدی اؤزون یئتیریر زیرناچی یا و دئییر : "سن شاها نه دئدین کی اونا او قَدَر خوش گلدی و بو قَدَر سنه انعام وئردی؟ " زیرناچی دئدی : " دییه رم آمما بو ایشین بیر آز خرجی وار .سنه باخاربیر توربا قیزیلا . " وزیر دییه ر اوسسون قبول دی.زیرناچی دییه ر : " قدیم لر من شا هین زیرنا مَعَللی می یدیم کی اونا هر زادی اؤرگَت میشدیم فقط قالمیشدی بیر پوفی کی اونی دئدیم . " وزیر اَل چَح مَه دی و دئدی هوهمان گَرَح منه ده اؤرگه ده سن . زیرناچی نئچه موددَت وزیره قوناغ اولوب بوتون هاوالاری اونا اؤرگه دَر .

گون او گون اولار کی بیر گون شاه ،وزیری نن چیخار شیکارا .شاهلار آییغ اولا للار و گؤره رکی بیرشئی اونون پالتارینی بَح شیشیدیب دی . سوروشار : " نه دی او کئف ده دیح دوروب شیشیب دی ." وزیر دییه ر : "قربان ائله سیزین کینه تای بیر شئی دی . " شاه تَعَججوب ائلی ییب دییه ر : " چیخات گؤروم نئجه بیر شئی دی . " شاه گؤره ر بیر اوزون زیرنادی و دییه ر :" حتمَن کی گتیریب سن چالاسان ! پس چال گؤروم نه جور چالیرسان . " وزیر باشلار سن به یه نن بیر گووه ح هاواسی چالماغا و بوتون نؤکر لر دوشه للر اویناماغا .  شاه بوله رکی اولا اولمویابو ایش حیکمت سیز دَ یی . سورا باشلار وزیری سوحمه یه و اودا اولوب گئچن لری آننادار . شاه شیکار دان واز گئچیب دستور وئره ر هاممی قئییتسین قصره .  سورا بیرین یوللار زیرناچی نین دالیجا و او قصره  گلینجه امر ائله ر کی وزیری نن زیرناچی ،  لیباس لارین چیخاردیب بیر بیری لری نن دَییشه لر . سورا شاه اوزونی وزیره توتوب دییه ر : " بو گون نن سن قصرین زیرناچی سی سان و زیر ناچی دا بو هوش باشی نان منیم وزیریم ." بئله لی یه نن ناغیل قورتولار آمما او هارا کی بیر زادی گؤره سن او هارا کی ائشیده سن .

خوی روایتی  -  24/2/52