علیرضا ذیحق
سئودا
نه کئچن گونلره گون چیخار بیرده
نه درمان تاپیلار کؤهنه لمیش درده
ییرتیلماسین حورمت دئییلن پرده
باریشیق دونیادا ان گؤزل سؤز دور
***
اوره ک لر شن اولسون سؤزلریمیز دوز
دوز اینسان یاشاسین دونیادا یوز
دُوس دا قانماز اولسا تئز بوراخ ال اوز
آجی سؤز هر زامان سؤنمه ین کؤز دور
* * *
داشسین کؤنولده محبت سئل لری
داراسین سئودامیز ساچاق تئل لری
اونوتمایاق وطن داشی ائللری
ائولاد لار وطنه اینان کی گؤز دور
1396
یدالله مفتون امینی
ترجمه به ترکی : علیرضا ذیحق
ایل لر گئتدیلر
ساری آتلار کاروانیندان دوشمه میش
ماوی چایین اهمالجا آخیشی لا
ایللر گئتدیلر.
ایللر
یئنی جه دامادلارکی اوزگون ایدیلر
سون قوروش لاری دار گرده ک لرین یاریمچیق یانان
چیراغ لاری اؤنونده فایدا وئرمه میش!
ایللر گئتدیلر
ایللر گئتدیلر و اؤزلریله سئوگی نی ده، ماهنی نی دا آپاردیلار
آلمانی، اوزوگو، قدحی، گزمه گی و اوچو شؤدا آپاردیلار!
سحر یئلی چیرپینارکن، اوتانسین شمعین وفاسیندان
سحر کؤچن لر گئجه دوستلاری ایله وداع لاشمایینجا
ایللر گئتدیلر
لحظه لر قالدیلار
سون فورصت، نه قدرده آزراق و قورخوداجاق
یادیگار قالمیش بیر سیگارتک، مسلول بیر شاعیرین یانیندا
بیر عؤمور یاندیریلمامیش.
هاشم عابدی
حورمتلی دَیَرلی دوستوم " علیرضا ذیحق " دوستوما
حاقلی سان ، حاقلی سان ، گونشه قارشی
صاباحی ایزله ییر گؤزلرین سنین
ایستک سن ، وئرگی سن ، خیالسان بوتون
اوینادیر روحومو سؤزلرین سنین
----
یارانیش دویغوندا قات با قات آییق
بولود تک سولودور چیله نیر منه
اؤزگرلوک ، جانداشلیق ، گؤزل دیلک لر
دویغوسال شعرینده اله نیر منه
----
اینسانلیق یاراشیر ، یاشاییر سنده
بوشونا دئییل کی آنیرام سنی
امین اول کؤنلومون سارایینداسان
ادب سن حیاسان تانیرام سنی
----
جانیمدا یئرین وار قارداشلاریم تک
گووه نمک اومورام چاغداشلیقیندان
عصیر لر اؤته ده قالمالی سان سن
دویمارام دؤنمه رم یولداشلیقیندان
1365