قصه های قرآن به زبان ترکی / قرآن ناغیل لاری: " شعیب " نبی نین داستانی / علیرضا ذیحق

علیرضا ذیحق

قرآن ناغیل لاری:

" شعیب " نبی نین داستانی

شعیب نبی نین آللاها اولان محبتی او قَدَر چوخ ایدی کی اوچ دفعه نییاییش ائده رک ایختییارینی اَل دن وئریب حددن آرتیق آغلارکن هوش دان گئت میشدی. دؤدونجو دفعه کی یئنه بو دویغو بیله سینه اَل وئریر، تانری اونو سیناغا چکمک اوچون بئله نکی بیر نیدا یوللاییر :

  علیرضا ذیحق

قرآن ناغیل لاری:

" شعیب " نبی نین داستانی

شعیب نبی نین آللاها اولان محبتی او قَدَر چوخ ایدی کی اوچ دفعه نییاییش ائده رک ایختییارینی اَل دن وئریب حددن آرتیق آغلارکن هوش دان گئت میشدی. دؤدونجو دفعه کی یئنه بو دویغو بیله سینه اَل وئریر، تانری اونو سیناغا چکمک اوچون بئله نکی بیر نیدا یوللاییر :

" ای شعیب اگر سنین حزین سیزیلتی و آغلامالارین جهنم دن قورخماق اوچون دور بونو بیل کی سنه جهنم اودی حرام دیر. اگرده آغلاییش لارین و عیبادت لرین اوننان اؤتوردی کی بئهیشته گئده سن ، سنه بئهیشته گئتمک موشتولوغو نو ایندی دن وئریره م ."

شعیب آزجا دوشونه رکن جاوابدا بئله دئدی :

" منیم آغلاماق لاریم او محبت کندیری اوچون دور کی منی بوتون وارلیقیم لا تانری عشقینه باغلاییر و قورخوم بو دور کی حیاتا گؤزیوممادان بو کندیر قیریلا و آللاه سئوگی سین دن محروم اولام ."

"شعیب " نبی نین ائل اوباسی اونون دعوتینه اینانمادان و بیرجه تانری نین اینسانلارین سعادتی و صلاحی اوچون ائتدی یی سیفاریش لره بویون اَیمه دن ، ایمان لی آدام لارین دا شعیب ایله گؤروشمه لرینه مانع اولوردولار . اونو ن ائل طایفاسی یوزمین نفر اولسادا قیرخ مینی اوغورلوق ، ناموس سوزلوق و یول کسمک کیمی کؤتو ایش لره باخسا لاردا باشقالاری اؤزاَمَک وآبیر لاری لا یاشایان آداملار ایدیلار . آمما تأسف لر کی چون پیس لرین چیرکین عمل لرینه دؤزوب سس لرینی چیخارتمیردیلار اونلاردا تانری حوضورون دا گوناهکار ساییلیردیلار .

بو اوزدن ده بیر گون گؤی اوزه ری نی قارا بولودلار آلیب خلق سئوینه رک او توتقون هاوادان یاغیش یوخ بلکه ایلدیریم لار یاغیب شاخاراق ، هر یئر اودا چکیلدی و آلوولار یوکسه لرکن گوجلو بیر زلزله نن بوتون آداملار یانار کوله دؤنه رک هلاک اولدولار .

شعیب نبی دونیادا ایلک اینسان ایدی کی چکی نی و تَرَزینی یئر اوزون ده مرسوم ائتدی تا هامی حلال آلیش وئریش ائتمک ایله کیمسه نین حاققی آرادان گئتمه یه .شعیب حضرت لری یاشایان دؤوره ده ، احتکار ائله مک و تیجارت ده چکی یه تَرَزی یه باخمادان ، اؤزگه مالینی اوغورلاماق و اَیری لیک له داورانماق چوخ عادّی بیر ایش ایدی و اونون نصیحت لری بیر پارا آدام لارین ضرَرینه تمام اولماق اوچون ، حتتا بیرگون ییغیشیب شعیبی شهردن ائشی یه اؤتورورلر کی بوایش ده باعیث اولور تانری نین غضبینه داها آرتیر.شعیب نبی یاشادیقی اؤلکه سی " مدین " دن باشقا " اَیکه " اهلی نی ده دوز یولا و تک آللاها دعوت ائتمک اوچون مبعوث ایدی کی اونلارین دا داورانیش لاری "مدین " اهلی کیمی اولاراق، اونلاردا جزالانیر لار .آنجاق تانری لوطفی ایله شُعِیبه اینانان و اونون دعوتینی قبول ائده نلر و ظولمه قارشی اعتراض سسی قالدیرانلار بو بلالردن جان قورتاریر لار .

شعیب نبی 242 ایل یاشایاراق حضرت " موسی " نان دا گؤروشور کی حتتا قیزی صفورانی اونا وئرمک له اؤزونه داماد ائدیر .

شعیب حضرت لری نین حیات طرزی و معنوی سیفاریش لری خلق اوچون بؤیوک بیر اؤیود و اؤرنَک اولوب بیرجه تانری یا ایمان گتیره نلرین سایی گؤنو گون دن آرتیر.