یادداشتی به زبان ترکی / فریدون حصاری دن خاطیره لریم / علیرضا ذیحق

علیرضا ذیحق

فریدون حصاری دن خاطیره لریم

سایریشان اولدوزلارین بیر – بیر آخماسی ، کؤنول لری کدره بوغسادا اونلارین سؤنمز ایشیقیینی  هئچ ده دانماق اولماز . اونلار گله جه یین هادی سی و گؤزلریمیزین نورو اولاراق ایل لره میدان اوخویوب  یاشار ایده ال لارا ایز آچیرلار .

علیرضا ذیحق

فریدون حصاری دن خاطیره لریم

سایریشان اولدوزلارین بیر – بیر آخماسی ، کؤنول لری کدره بوغسادا اونلارین سؤنمز ایشیقیینی  هئچ ده دانماق اولماز . اونلار گله جه یین هادی سی و گؤزلریمیزین نورو اولاراق ایل لره میدان اوخویوب  یاشار ایده ال لارا ایز آچیرلار . فریدون حصاری ده بیر شاعیر اولاراق یانیقلی کؤنلو ایله  ائل اوبانین صادیق نغمه کاری اولوب حیاتی بویونجا دیلیمیزی ، دردیمیزی و سایسیز نیسگیل لریمیزی قلمه آلیب جانی ایله روحو ایله  چوخلو میصراع لارین یارادیجی سی اولوب دی . فریدون حصاری نی ایلک گؤردویومده 1359 – نجو ایل ایدی .جمعه آخشاملاری تبریزین تربیت کیتابخاناسیندا یحیی شیدا نین باشچی لیقی ایله شاعیر لر مجلیسی قورولوردی . من اوزامان لار حسین فیض الهی وحید و سلیمان ثالت ایله یئنی جه تانیشسام دا خوی دان تبریزه گلدی ییم اوچون جمعه آخشانلاری هتل عوضی اونلارین قوناغی اولاردیم . هفته ده بیر گئجه او عزیز لرین ائوینده اولارکن باشقا شاعیرلرله ده تانیش لیغیم اولاردی . عباس بارز ، ائل اوغلو ( صدیار وظیفة ) ، بهرام ائلچین ، اصغر فردی ، حمید احمد زاده ( تئلیم خانلی )، ستار گول محمدی و آیری – آیری شاعیرلری ده ائله بو قوناق لیق لاردا تانیدیم . آمما فریدون حصاری نی اؤنجه شاعیرلر مجلسین ده تانی ییب سونرا حسین فیض الهی وحید گیل ده آرتیق راق اونون حیاتی و یارادیجیلیقی ایله تانیش اولدوم . او محزون باخیشی ، مهربان سسی ، اونودولماز شعرلری  و اوجا بویو ایله خاطیریمده قالارکن ، ایللربویو اونو گؤرمه سه م ده 33 ایل سونرا رضا همرازین آتاسی نین یاسیندا اونو گؤره رکن یئنه بیر بیریمیزی تانی ییب قوجاقلاشدیق . سون گؤروشوموز چوخ آز بیر لحظه لر دوام ائتسه ده ، زمانه نین توزو و آجی لاری اونون سیماسیندان بللی ایدی . نئجه کی من ده داها او گنج لی ییمی ایتیریب 55 یاشینا گلمیشدیم .

فریدون حصاری دن ائشیتدی ییم ایلک شعری هئچ واخت یاددان چیخارتمامیشام . اونون آذربایجانلی اوشاق بیر ینجی کیلاسدا آدلی شعری ، اوقدر درین دویغولارا مالیک ایدی کی ایستر ایسته مز بیر معلم اولارکن گؤز یاشلاریمی آخیتمیشدی و بیزیم نییه بئله بیر قارا طالع یاشادیغیمیز منی سیخینتی لار ایچره بوراخمیشدی . سونرا لار بو شعرتبریزده یایینلانان ده ده قورقود درگی سی نین 3- نجو ساییسندا درج اولماقلا (30/7/59) ، آذربایجان شعرینده یئنی بیر اولدوزون دوغولماسی گؤز اؤنونه چیخدی . فریدون حصاری بئله لیک له ده ده قورقود درگی سی نین امکداش لارینا چئوریلدی و حتتا بو درگی نین هر آی دوز واختیندا یاییلماسی اوچون مادّی یاردیم لارینی دا اسرگه مه دی . فریدون حصاری نین ده ده قورقود قازئتینده چوخلو شعرلری چاپ اولسادا " کارگر قدرتی " و " گئت عموسام " شعرلری داها آرتیق آلقیش قازاندی و شعر میراثیمیزین قیزیل صحیفه لرینده همیشه لیک بیر دَیَرصاحیبی اولدو .فریدون حصاری دن سؤز آچدیقدا اونون سئویملی قلم صاحیبی اولان اوغلو رضا حصاری نی ده اونوتماق اولماز . اونو هرزامان گؤره رکن اوغلو رضا دا یانیندا یْدی . رضا یازی دا و شعر ده " اورمان " تخلص ائدیردی و اونون اثرلری ده "ده ده قورقود " قازئتین ده آردیجیل اولاراق درج اولونوردی . دئمک کی ده ده قورقود درگی سی حسین فیض الهی وحیدین امه یی له چیخارکن من ده باشاردیقجا اونا یاردیم ائده ردیم .

ایندی او ایللردن چوخلی آی گون گئچسه ده ، فریدونی ایتیرمیشیق آمما اونون عطیرلی و خاطیره لی رایحه سی ، همیشه بیزیمله دیر . اونون شعرلری کیتاب شکلینده چیخارکن ، آذربایجان ادبیات سماسیندا پارلایاجاق دیر و اؤز نورونو ، گله جک نسیل لره یاغدیراراق  اونون شاعیر سهنده یازدیقی بو شعری خاطیرلاداجاق دیر :

ده ده قورقودون خلف اوغلونی

یادیندان چیخارتماز هئچ زامان ائل لر

گزه جک دیللرده سازیمین سؤزو

ترنم ائده جک سازدا کی تئللر

سهندیم ابدی باقی قالاجاق

دونیالار دوردوقجا اوره ییمیزده

هامی اوره ک لرده مسکن سالاجاق

قول قاناد آچاحاق دیله ییمیز ده  

شهریور آیی 1394