قصه ای به زبان ترکی /آنا / حکایه / علیرضا ذیحق

علیرضا ذیحق

آنا

حکایه

گؤزلریم دولموشدو . هئچ اینانمیردیم کی او بو جور سس سیز بیزلری قویوب گئتسین . آمما ندنسه بو بیر گرچک ایدی. اوره ییم پاتلاییردی آمما سسیم  هئچ چیخمیردی. کیمسه نین اوزونه باخماغا حؤوصله م قالمامیشدی. اونون سون تاپشیریقی هله یادیمدا ایدی. بیر ساعات اوستون دن کئچمه میشدی

علیرضا ذیحق

آنا

حکایه

گؤزلریم دولموشدو . هئچ اینانمیردیم کی او بو جور سس سیز بیزلری قویوب گئتسین . آمما ندنسه بو بیر گرچک ایدی. اوره ییم پاتلاییردی آمما سسیم  هئچ چیخمیردی. کیمسه نین اوزونه باخماغا حؤوصله م قالمامیشدی. اونون سون تاپشیریقی هله یادیمدا ایدی. بیر ساعات اوستون دن کئچمه میشدی . یول اوستونده ائوه گئده رکن اونا هرگون باش ووراردیم . بوگون ایسه اَلیم ده بیر قارپیز ، اونو گؤرمک اوچون جان آتیردیم . منده ده آچار اولدوغو اوچون ، قاپینی هئچ دؤیمز دیم . اؤز ائویم کیمی آچیب ایچه ری گیره ردیم . آنام ، آتام ایله بیرگه یاشاسادا چوخ یالقیز ایدی. آیاقلاری نین آغریسی و توتولماسی اونو اوتوراق ائله میشدی. گون بویو ائوده یالقیز قالیب تکجه تئلفون لا باغلانتی قورماق مجبوریتینده ایدی. اونو گئدیب گؤرمک  و سوروشوب  یوخلاماق  منه همیشه بیر گؤره و کیمی قوتسال ایدی. آنجاق اونو ن واخت سیز گئتمه سی منی اوزون بیر فیکیره آپارمیشدی. سئویملی یاشیل گؤزلری نین  سؤنمه سی اینانیلماز ایدی. آمما او ایندی ، گؤزلریم اؤنون ده جان سیز اوزانمیشدی و بو قَدَر سس سیزلیک اونون ابدی بیر یوخویا دالماسینی دئییردی.  ایچین – ایچین آغلاییردیم و گؤز یاشلاریمی توتانمادان بوتون تار – تانیشا تئلفون آچیردیم کی اونون سون سَفَری اوچون ، اؤزلرینی ائوه چاتدیرسین لار . اوردا من له تکجه آتام وارایدی ایدیق و ایکی میزده بو اولای دان شاشقین ، نه دئدی ییمیزه قالمیشدیق .

آتام من دن آزجا تئز ائوه چاتمیشدی آمما اودا ائوه گیردیک ده من کیمی اونو سوسموش و سَمیر سیز گؤرموشدو . ایشین نه اولدوسو ، ایکی میزی ده فیکره آپارمیشدی. آمما ایکی میز ده یاخشی بیلیردیک  کی بیر داها بیز ایله اولمایاجاق و او وارلیقا ویداع ائدیب دیر.  بیر ساعات اؤنجه من ایله تئلفون باغلانتیسی  قوراراق ایسته میشدی کی صاباح مسجید ده توتدوردوغو مراسیم اوچون سنگک ، پنیر ، ساندویچ و بیر پارا شئی لر آلام . اونو ن آئله آرا سیرا قونشو مسجید ده  قادین لار طرفین دن توتولموش قرآن قرائتی نه آپاراردیم و صابا حین مجلیسی ده  اونا حساب ایدی. اونون  بئله نکی اِحسان لاری چوخ اولاردی.

یاس مراسیمی نه قَدَر اوزون سورسه ده آنجاق بیر گون بیتدی آمما من هله ده  بو واخسیز و تئزراق اؤلومو سَبَب سیز بیلمیردیم . حتمَن کی بیر عیلّتی وار ایدی و سونرالار ایدی کی بیلدیم بو دوشونجه ده حاقلی ایدیم . اؤزو، اؤز اَلی ایله اؤلومونو قاباغا سالمیشدی .  اوحیات دان بئزیشه رک داها یاشاماق ایسته مه میشدی. او تانسیونو و ها بئله عصب لری نین  آرامیشی اوچون گون ده نئچه نوبت داوا یئمه لی ایدی کی دئمه بیر مدت ایمیش اونلاری کسه رک داها یئمیری.  او حیات دان سینسی میشدی ، شاید ده  ائولاد لارین دان ، آتام دان و هرکیمه کی بیر گون محبت ائدیب اَمه یینی چکمیشدی.  او بیر گون منه و باشقا اوغول لارینا کی چوخ دؤولت لی  و وارلی کارلی ایدیلار دئمیشدی : " گون ده بیر حالا قالیرام ! منی آپارین تبریز تهران داکی دوکتور لارین بیرینه کی بورانین دوکتورلاری فقط باشاریرلار آدام اؤلدوره لر. "

آمما کیمسه بو سؤزو اؤزونه آلماییب و آیلار ایدی کی بیر – بیری میزین بوینونا سالیردیق. دئمک کی اونو دوکتورا  آپارمایینجا هامی میز اونو اونوتموشدوق  و اودا اؤلومونو اوتَهَر قابا سالدیقدا ، ایسته میشدی بیزه بیر سؤزلر دئمیش اولا . نییه کی او هئچ واخت بیر سؤزو ایکی یول دئمزدی.

 اونون ایتگی سی آجییان یارا کیمی،   هله ده هر یادیما دوشدوک ده  اوره ییمی گؤینه دیری و قلبیم ده  آنا دییه رک گؤزلریمین یاشی دورماق بیلمیری.