شعری به زبان ترکی / آنادیلی / علیرضا ذیحق

 

علیرضا ذیحق

آنا دیلی

 دیلیم دیلیم دوغرانیرساق

هئچ بیر دیل اولماسین یاساق

اودیوردون گونش سارینجا

آنا دیلین ، یادلاریارینجا

دیل بیر اولوب بیز بیرله شک

اؤلکه میزه نور چیله یک

آنا دئییب غوروروموز

اولسون بیزیم اوغوروموز

مکتب لرده تورک ماهنی لار

اوخونوب قاچسین یاغی لار

آذربایجان ائولادلاری

قوی اَریتسین پولادلاری

دوستاق لارا ائل دوشمه سین

ائل اوبا یا سئل دوشمه سین

کوراوغلودا چالسیین سازین

آنادیلی قورسون یازین

چادیرلاردا ، چادیر چادیر

هئی ده اوجالسین چال چاغیر

اوشاق لارین شیرین دیلی

آنا دئییب سئوسین ائلی

دیلیمیزی عزیز ساناق

تورک کؤکونو هئچ دانمایاق

آنا ائلین باش تاجی دیر

اونون دیلی جان باجی دیر

قارداش اولاق باجی اولاق

جان جان دئییب یولا باخاق

یولداش کیمی  دیل بیرله شک

داغلار تکین بیز دیرچه لک

آنادیلی بایراغیمیز

ائل اوبادیر دایاغیمیز